Orain gutxi arte, errendimendu altuko taula asko ikusten ziren uretan. Surflari trebeentzat primerako oholak izan arren, beste guztiontzat ez ziren oso lagungarriak. Azken urtetan shaperrok lan asko egin dugu ohol mota hau garatzen, eta zorionez, gaur egungo performance oholak primeran egokitzen dira surf maila guztietara. Adibidez, Gabriel Medinak darabilen modelo bati dimentsio eta ezaugarriren bat aldatuz gero, egokia izan daiteke lehen maniobrak ikasten ari den edozein surflarirentzat ere. Ondo pertsonalizatutako errendimendu altuko taula batek, distira berezia atera diezaioke zure surfari, trebakuntza maila etengabe hobetzen lagunduz.

Udako taula on batek baditu derrigor izan beharreko ezaugarri batzuk. Batetik, olatuak erraz hartzeko egon behar du diseinatua. Bestalde, behin zutik jarri eta olatuan irristatzen hasita, maniobrak egiteko abiadura sortu eta mantentzen lagundu behar du. Hortaz gain, guretzat garrantzia berezia du udako oholek olatu on eta itsas baldintza indartsuagoetan ere ondo funtzionatzen jarraitzeak. Azken puntu honi arreta berezia jarrita sortu ditugu Summertoys ataleko modelo guztiak.

Era askotariko surf taulek osatzen dute sail hau. Itsas baldintza ezberdinetan primeran erantzuten duten taula moldakorrak dira, trebakuntza maila guztietarako surflariengan pentsatuz diseinatu direnak.